Rialacha níos simplí le haghaidh geilleagar níos láidre

Forléargas

Tá simpliú rialacha an Aontais á chur ag an gCoimisiún Eorpach i gcroílár a chláir oibre don iomaíochas agus don rathúnas.  

Is é an sprioc atá ann tacú leo siúd a chruthaíonn luach san Eoraip agus a chur in iúl don domhan go bhfuil an Eoraip lán dáiríre, agus ár n-ardchaighdeáin á gcoinneáil againn ag an am céanna. 

Cén fáth ar gá rialacha an Aontais a shimpliú?

Tá rialacha simplí soiléire ríthábhachtach do ghnólachtaí agus do shaoránaigh na hEorpa: 

Tá béim leagtha ag gnólachtaí san Aontas, idir bheag agus mhór, ar an gcaoi a bhfuil an t-ualach rialála ina bhac ar an bhfás. 

D’éist an Coimisiún lena n-iarraidh agus tá sé ag gníomhú ina leith: tá bearta simpliúcháin molta againn a fhágfaidh gur fusa a bheidh sé do ghnólachtaí oibriú ar fud an mhargaidh aonair, agus cothroime iomaíochta á cinntiú agus ardchaighdeáin shóisialta agus chomhshaoil á gcaomhnú ag an am céanna. 

Lenár n-iarrachtaí simpliúcháin go dtí seo, sábhálfar thart ar €15 bhilliún i gcostais riaracháin bhliantúla ar ghnólachtaí, ar thionscail, ar fheirmeoirí agus ar údaráis náisiúnta. 

Is féidir na billiúin euro de choigiltis a infheistiú sa gheilleagar gach bliain, airgead a bheidh atreoraithe ón maorlathas go poist, nuálaíocht agus fás.

Téann sé chun tairbhe go háirithe d’fhiontair bheaga agus mheánmhéide. Tríd an ualach riaracháin a laghdú 35% ar a laghad do FBManna, cuidíonn an simpliú le cuideachtaí beaga níos lú ama a chaitheamh ar mhaorlathas agus níos mó ama a chaitheamh ar a ngnó a fhorbairt. 

Ar fud na ngnólachtaí uile, tá sé beartaithe againn an t-ualach riaracháin a laghdú 25% ar a laghad, is é sin coigilteas €37.5 billiún a mheastar a bheith ann faoi 2029.