Forléargas
Tá múnla sóisialta uathúil na hEorpa bunaithe ar rathúnas a chruthú agus a chinntiú ag an am céanna nach bhfágfar aon duine ar lár. Tá go leor bainte amach againn, ach tá obair fós le déanamh. Bhí tionchar ag na géarchéimeanna a tharla le blianta beaga anuas ar chaighdeáin mhaireachtála go leor Eorpach. Tá easpa tithíochta inacmhainne, rochtain ar sheirbhísí riachtanacha, bochtaineacht agus neamhionannais deiseanna ag bagairt dochar a dhéanamh do na ceangail a choinníonn le chéile muid.
Leanfaidh ár sochaithe agus ár ngeilleagair de bheith ag forbairt. Ciallaíonn sé sin go gcaithfimid ár n-iarrachtaí a dhíriú ar cháilíocht na beatha a thaitníonn linn inniu a chothú agus a fheabhsú. Sna cúig bliana amach romhainn, oibreoidh an Coimisiún Eorpach chun cothroime shóisialta a chur chun cinn, comhtháthú sóisialta agus réigiúnach a neartú, agus comhdheiseanna a chinntiú do chách.
An méid a cheapann muintir na hEorpa
Cuspóirí
Deiseanna, cobhsaíocht agus folláine a chur ar fáil do chách- Ár múnla margaidh shóisialta a neartú
chun aistriú cothrom a chinntiú do chách
- Dul i ngleic leis an neamhionannas, leis na héagothromaíochtaí réigiúnacha agus leis an idirdhealú
An chaoi a mbainfimid ár gcuspóirí amach
Sna blianta amach romhainn, oibreoimid orthu sin ar na bealaí seo a leanas:
Cothroime shóisialta a chur chun cinn sa gheilleagar nua-aimseartha
Chun an chothroime shóisialta a chinntiú, déanfaimid an méid seo a leanas:
- plean gníomhaíochta nua a leagan amach maidir le cur i bhfeidhm Cholún Eorpach na gCeart Sóisialta chun ár bpríomhspriocanna sóisialta do 2030 a bhaint amach
- tacú le pá cothrom, le dálaí maithe oibre, le hoiliúint agus le haistrithe córa ó phost go post trí threochlár nua um poist ar ardchaighdeán
- an t-idirphlé sóisialta Eorpach a neartú trí chomhshocrú nua maidir le hidirphlé sóisialta Eorpach
- aghaidh a thabhairt ar bhunchúiseanna na bochtaineachta tríd an gcéad straitéis frithbhochtaineachta riamh de chuid an Aontais
- eisiamh sóisialta leanaí a chosc agus a chomhrac trí oideachas, cúram sláinte, agus seirbhísí poiblí riachtanacha tríd an Ráthaíocht do Leanaí a neartú
- dul i ngleic leis an ngéarchéim tithíochta tríd an gcéad phlean tithíochta Inacmhainne Eorpach riamh a chur chun cinn agus trí ardán infheistíochta uile-Eorpach a chruthú do thithíocht inacmhainne agus inbhuanaithe
- an Ciste Aeráide Sóisialta a chur i bhfeidhm chun tacú le hathchóirithe agus le tithíocht atá tíosach ar fhuinneamh
- dul i ngleic le bunchúiseanna an athraithe dhéimeagrafaigh
- éagothromaíochtaí réigiúnacha a laghdú ionas gur féidir le muintir na hEorpa cónaí agus oibriú san áit a dtugann siad baile uirthi
Chun an dlúthpháirtíocht i measc na saoránach a mhéadú, déanfaimid an méid seo a leanas:
- oibriú ar chearta na mionlach a chosaint
- Erasmus+ a neartú le go mbeidh níos mó Eorpach in ann scileanna nua a fhoghlaim agus tuiscint fhrithpháirteach níos fearr a fhorbairt
- Idirphléití Beartais bliantúla leis an Aos Óg a eagrú chun a chinntiú gur féidir le daoine óga a dtuairimí a chur in iúil ar mhaithe le todhchaí an Aontais a mhúnlú
- Bord Comhairleach don Óige a bhunú le daoine óga ó gach Ballstát chun comhairle a chur ar Uachtarán an Choimisiúin maidir le saincheisteanna a bhaineann leis an óige
- fiosrúchán uile-Aontais a dhéanamh ar thionchair níos leithne na meán sóisialta ar fholláine daoine
- aghaidh a thabhairt ar dhearadh andúile na seirbhísí ar líne
- plean gníomhaíochta a chruthú i gcoinne na cibearbhulaíochta
- é a dhéanamh níos éasca do dhaoine tairbhe a bhaint as oidhreacht chultúrtha shaibhir ilghnéitheach na hEorpa
Chun fíor-chomhionannas a bhaint amach, tá an méid seo a leanas déanta againn:
- an straitéis maidir le comhionannas LGBTIQ tugtha cothrom le dáta agus straitéis nua frithchiníochais forbartha, ionas go mbeidh rath ar gach duine agus gur féidir leo a bheith ina gceannairí, gan beann ar cé hiad féin
- treochlár forbartha do chearta na mban agus straitéis nua forbartha don chomhionannas inscne
An dul chun cinn go dtí seo
Déan monatóireacht ar dhul chun cinn tionscnamh nua, dlíthe atá beartaithe agus athruithe reachtacha faoin tosaíocht seo, lean iad, agus coinneáil cothrom le dáta leo
- Mí an Mhárta 2026
Leag an Coimisiún amach an straitéis um chomhionannas inscne 2026-2030 agus an chéad straitéis riamh um an gcothroime idir na glúine
- Eanáir 2026
Cuireadh an straitéis nua frithchiníochais i láthair
- Nollaig 2025
Seoladh an Plean Eorpach um Thithíocht Inacmhainne
Cuireadh treochlár i láthair le haghaidh poist ardcháilíochta a sheasfaidh an aimsir, chun borradh a chur faoin táirgiúlacht, faoin rathúnas agus faoin iomaíochas
- Samhain 2025
Seoladh an ráthaíocht scileanna chun tacú le hoibrithe scileanna foghlama a aistriú le haghaidh earnálacha straitéiseacha
- Márta 2025
Cuireadh aontas na scileanna i láthair, ar plean é chun oideachas, oiliúint agus foghlaim ar feadh an tsaoil ar ardchaighdeán a fheabhsú
Síníodh Comhaontú comhpháirteach nua maidir le hidirphlé sóisialta Eorpach chun ról na gcomhpháirtithe sóisialta a neartú maidir le margadh an tsaothair, fostaíocht agus beartais shóisialta a mhúnlú
I lár an aonaigh
Déanann an bhochtaineacht difear do dhuine amháin as gach cúigear Eorpach, ina measc sin leanbh amháin as gach ceathrar, agus tá thart ar 1 mhilliún duine gan dídean ar fud an Aontais.
Tá pacáiste beart molta ag an gCoimisiún chun cur leis an iarracht ar dheireadh a chur leis an mbochtaineacht agus leis an ngéarchéim tithíochta, ina measc sin an chéad straitéis frithbhochtaineachta riamh de chuid an Aontais, Ráthaíocht neartaithe do Leanaí agus gníomhaíocht chun aghaidh a thabhairt ar eisiamh tithíochta.
Cé atá i gceannas
An Leas-Uachtarán Feidhmiúcháin um Chearta Sóisialta agus Scileanna, um Poist Ardcháilíochta agus um Ullmhacht
An Leas-Uachtarán Feidhmiúcháin um Chomhtháthú agus Athchóirithe
An Coimisinéir um Chomhionannas; Ullmhacht agus Bainistíocht Ghéarchéime
An Coimisinéir um Fhuinneamh agus Tithíocht
An Coimisinéir um an Daonlathas, an Ceartas agus an Smacht Reachta agus um Chosaint Tomhaltóirí
An Coimisinéir um Chothroime Idirghlúine, um an Óige agus um Chultúr agus Spórt