NRK Vestland

Ein bil har køyrd av vegen og treft fjellveggen på fylkesveg 5044 Vestlivegen ved Brotåsen på Stord, melder politiet.

– Sjåføren er oppegåande, men tek ein tur til legevakta for sjekk, opplyser operasjonsleiar Dag Steinkopf i Sør-Vest politidistrikt.

Føraren, ein mann i slutten av tenåra, blir avhøyrt på staden. Politiet opprettar sak og har fråteke mannen førarkortet.

Bilen står ikkje til hinder for trafikken, men står fast i grøfta. Bilbergar er på veg.

Politiet har rykt ut til Bergen sentrum med store ressursar etter melding om at ein person skal ha truga nokon med kniv.

Politiet har kontroll på vedkomande, og ingen skal vere skadde.

Fotballspelar Elise Stenevik frå Florø går frå Everton FC til tyske FC Köln.

Den 26 år gamle nordmannen skal styrkje forsvaret og har skrive under ein kontrakt som varer til 30. juni 2028, skriv klubben på sine sider.

– Elise Stenevik passar svært godt inn i profilen vi ser etter. Som forsvarsspelar har ho mykje erfaring frå internasjonalt toppnivå og imponerer særleg med styrken sin i duellar, robustheita si og den sterke venstrefoten, seier Nicole Bender-Rummler, direktør for kvinne- og jentefotball i FC Köln.

Stenevik seier at ho gler seg og føler ho har tatt eit rett val.

– Eg kan nesten ikkje vente med å bli skikkeleg kjend med lagvenninnene mine, trenarteamet og supportarane, og med å spele kampar for den nye klubben min.

Politi og brannvesen rykker ut etter melding om brann i nokre pallar og dekk utanfor ein verkstad i Rådal i Bergen.

Politiet opprettar sak etter ein bil var i full fyr på fylkesveg 47 Tittelsnesvegen i Sveio.

Politiet fekk melding om bilen som stod i brann på eit busstopp klokka 17.32.

Brannvesen og politi rykte ut og brannen vart meldt sløkt ein halvtime seinare. Vegen var stengt ei kort stund.