Les på norsk.

Sámediggeráđđi evttoha reviderejuvvon bušeahtas 750.000 ruvnno Dárkkistanlávdegoddái.

Sámedikki dárkkistanlávdegoddi dáhttu guorahallat movt Sámediggi gieđahalai ášši mii guoská ovddeš sámediggeáirasii, Mikkel Eskil Mikkelsenii, ja lea sámediggeráđis dáhtton dása 750.000 ruvnno.

– Reviderejuvvon bušeahttaproseassas lea bearráigeahččanlávdegoddi čujuhan bušeahttadárbbuide, ja sámediggeráđđi lea evttohan lasáhusa sidjiide dán jagi, lohká ráđđelahttu Maren Benedicte Nystad Storslett.

Buot vuoruheamit reviderejuvvon bušeahtas leat ollislaš árvvoštallamiid vuođul, deattuha son. Reviderejuvvon bušeahtas Sámedikkis lea 14,8 mill. ruvnno juohkit,

– Lea dehálaš ahte bearráigeahččanlávdegoddi sáhttá čađahit iežaset parlamentáralaš bearráigeahču, ja lea dievasčoahkkin mii bidjá rámmaid dan bargui, lohká son.

Dárkkistanlávdegotti njunuš, Toril Bakken Kåven, lea duhtavaš ráđi evttohusain.

– Min beales lea dehálaš ahte beassat čađahit buori guorahallama. Ja nu ledjen gal juo rehkenastán ahte ráđđi čuovvola min sávaldaga, lohká son.

Lávdegoddi deaivvada geassemánus ja dalle álget geahčadit makkár mandáhtta sii geat čađahit guorahallama galget oažžut, čilge Bakken Kåven.

Les på norsk

Dáidda duođaštussan ja gierdavašvuohta leat guovddážis go čájáhusat «Mother Dough» ja «Folkeskikk» rahppojit Davvinorgga Dáiddamuseas Romssas geassemánu 4. beaivvi, čállá Davvinorgga Dáiddamusea neahttasiiddusteaset.

Geahčastagain Gazas Sápmái ja Norgii čalmmustahttet mo dáidda ja dokumentašuvdna sáhttá fievrridit muitalusaid ovddosguvlui kriissa, aktivismma ja olmmošvuoigatvuođaid rahčamušaid ovddas.

«Mother Dough» ovdanbuktá dáidaga ja arkiivvaid ealli ávdnasin – juoga mii bisuhuvvo eallin fuolaheami, sirdima ja gierdavašvuođa bokte.

Čájáhus lihkasta Gaza ja Romssa gaskkas, ja čájeha dáiddalaš geavadagaid mat doibmet duođaštussan dilálašvuođain gos muitalusat ja eallimat leat uhkiduvvon.

Čájáhus lea oassi Gaza–Tromssa ovttasbarggus 2026, viiddis kultur- ja máhttoprográmma mii lágiduvvo Romssas dán jagi.

«Folkeskikk» čájáhusas duođašta dáiddár ja govvejeaddji Jannik Abel olbmuid lihkadusaid Norggas ja Sámis.

Kámera bokte geahččá miellačájáhusa guvlui mii lea kollektiivvalaš doaibma ja demokráhtalaš ovdanbuktin.

Čájáhus čalmmustahttá dan mo rahčamuš olmmošvuoigatvuođaid, luonddu, friijavuođa ja riektestáhta ovdii leat gaskaneaset čadnon – ja mo servodat, aktivisttat ja sin gierdavašvuohta leat šaddamin mearrideaddji fápmun min áiggis.

Sámediggi lea juolludan lagabui 3,3 miljovnna ruvnnu doarjjan 36 sámi kulturmuitosuodjalanprošektii miehtá sámi guovllu.

Doarjja manná earret eará kulturmuittuid duođašteapmái, divvumii ja gaskkusteapmái.

– Kulturmuittut leat deaŧalaččat sámi historjjá gaskkusteapmái ja addet máhtu meahcásteami birra, dadjá sámediggeráđđi Jon-Christer Mudenia (NSR).

Minerálafitnodat Kingsrose Mining duođašta almmolaš børsadieđáhusas ahte ruvkefitnodat BHP geassáda sin ovttasbarggus Finnmárkkus.

BHP lea okta máilmmi stuorámus ruvkefitnodagain. Sii bissehit dál ruhtadeami guovtti jagi maŋŋá. Kingsrose dieđiha ahte sii dál váldet badjelasaset 100 % ohcanliseanssain, ja árvvoštallet ođđa ovttasbargoguimmiid.

Duorastaga álggii ášši guovtti almmáiolbmo vuostá Sis- ja Nuorta Finnmárkku diggegottis.

Okta lea Sis-Finnmárkkus ja nubbi ges Davvi-Ruoŧas eret.

Áššáskuhttineiseváldi oaivvilda ahte soai leaba máŋgii čorbmadan eará nuorra almmáiolbmo oaivái ja amadadjui, nu garrasit ahte fertii goaruhit vihtta sákkaldaga gállus. Dáhpáhus lea geavvan beassážiid 2025.

Almmáiolbmo guovttis eaba mieđit sivalašvuođa.

Diggeášši bistá vel ihttá beaivvi.