Earnáil dhigiteach ghlas

Le linn na Deacáide Digití, tá dhá dhúshlán thábhachtacha roimh an Eoraip: an t-aistriú glas agus an t-aistriú digiteach. 

D’fhéadfadh dhá shaincheist ar leith a bheith i gceist leo sin, ach is dhá dhúshlán iad i ndáiríre - ní éireoidh leo gan an ceann eile - agus, tá siad araon chomh tábhachtach céanna do thodhchaí na hEorpa. 

Trí dhigitiú a thabhairt isteach inár saol, cabhraítear linn ár lorg carbóin a laghdú. Is féidir linn páirt a ghlacadh i bhfíschomhdhálacha seachas taisteal chuig cruinnithe, faireachán a dhéanamh ar an méid fuinnimh a ídíonn ár dtithe, agus fiú borradh a chur faoin inbhuanaitheacht san fheirmeoireacht.  

Mar sin féin, ní mór dúinn a chinntiú nach n-ídíonn teicneolaíochtaí digiteacha níos mó fuinnimh ná mar a shábhálann siad. Faoi láthair, is ionann teicneolaíochtaí digiteacha agus idir 8-10 % dár n-ídiú fuinnimh, agus 2-4 % dár n-astaíochtaí gás ceaptha teasa – céatadáin bheaga ach líon mór. 

Is féidir linn roinnt athruithe a dhéanamh inár saol digiteach chun ár dtionchar ar an gcomhshaol sa réimse seo a laghdú. Mar shampla, dá gcuirfí síneadh bliana amháin le saolré gach fóin chliste, shábhálfaí 2.1 Mt CO2 in aghaidh na bliana faoi 2030, arb ionann é agus 1 mhilliún gluaisteán a bhaint dár mbóithre. Trí aistriú ó líonraí 4G go 5G, is féidir tomhaltas fuinnimh a laghdú suas le 90%.

Tá taighde á dhéanamh ag an Aontas ar na deiseanna sin agus ar a thuilleadh nach iad. Déanfaimid na dlíthe atá ann cheana a thabhairt cothrom le dáta agus tabharfaimid isteach bearta nua chun ár spriocanna glasa agus digiteacha a bhaint amach sna deich mbliana amach romhainn. Beart amháin den sórt sin is ea a áirithiú go mbeidh lárionaid sonraí aeráidneodrach, tíosach ar fhuinneamh agus inbhuanaithe faoi 2030 ar a dhéanaí.  

Tá bearta deonacha ceangailteacha á bhfiosrú ag an Aontas freisin chun cabhrú leis an earnáil phríobháideach a bheith aeráidneodrach agus níos mó acmhainní in-athnuaite a úsáid. Seo a leanas roinnt samplaí de sin: an Chomhghuaillíocht Eorpach Ghlas Dhigiteach, agus na tionscnaimh éagsúla chun an earnáil chlosamhairc a ghlasú.

Plean Tionsclaíoch an Chomhaontaithe Ghlais

Mhol an Coimisiún Eorpach Plean Tionsclaíoch an Chomhaontaithe Ghlais chun tacú lena sprioc aeráidneodracht a bhaint amach faoi 2050 agus iomaíochas thionscal glan-nialasachta na hEorpa a fheabhsú ag an am céanna.

Príomhcholún den phlean is ea a chinntiú go bhfuil rochtain ag an Aontas ar theicneolaíocht, ar tháirgí agus ar réitigh atá ríthábhachtach chun aistriú chuig glan-nialasacht. Áirítear orthu sin cealla fótavoltacha, tuirbíní gaoithe, ceallraí, leictrealóirí hidrigine, gabháil carbóin, trealamh stórála agus go leor eile. Is foinse mhór fáis eacnamaíoch agus post ardcháilíochta san Eoraip iad na táirgí agus na réitigh sin freisin.

Chun é sin a bhaint amach, leagtar amach ann próiseas chun dlús a chur le hinfheistíocht agus maoiniú le haghaidh táirgeadh teicneolaíochta glaine san Eoraip, rud a chuirfeadh an tAontas ar thús cadhnaíochta i réabhlóid na teicneolaíochta glaine. Chomh maith le féachaint ar smaointe nua amhail solúbthacht shealadach i rialacha maidir leis an státchabhair, moltar sa phlean féachaint ar an gcaoi ar féidir cistí atá ann cheana agus maoiniú coiteann ar leibhéal an Aontais a úsáid chun nuálaíocht, monaraíocht agus cur in úsáid na teicneolaíochta glaine a mhaoiniú.