Boazodoalloguovllu spirevahágat ledje jagis 2025 olahus stuorrá, čállá Lapin Kansa -aviisa. Diibmá spiret godde vádjit 6500 bohcco.
Lapin Kansa -aviisa dieđuid mielde jagis 2025 eanemus spirevahágiin mákse buhtadusaid Oivanki bálgosa boazodoalli Aikkila Jarmo Olavii. Sus spiret godde 67 bohcco ja buhtadussupmi lea sullii 103 500 euro.
Lapin Kansa -aviissa dieđuid mielde Sámi bálgosiin eanemus buhtadusaid mákset Báišduoddara boazodoalli Antti Nuorgamii. Sus spiret godde diibmá 59 bohcco. Buhtadussupmi lei lagabui 83 000 euro.
Go dili geahččá bálgosiid mielde, de Hossa-Irni guvlui mannet eanemus buhtadusat, vádjit 900 000 euro ovddas. Nubbin eanemus spirevahágiin leat gillán Giehtaruohttasa bálgosis.
Stáhta ii goittotge bastte máksit dál giđđat dievasmeari spirebuhtadusain. Stáhta máksá dušše 62 proseantta dáhpáhuvvan spirevahágiin. Loahppaoasi vigget oažžut maŋŋá stáhta lassibušeahta oktavuođas.
