Sámedikki kulturlávdegoddi lea almmustahttán kulturdoarjagiid oažžuid jahkái 2026. Doarjagiid mákset oahpahus- ja kulturministeriija mieđihan stáhtadoarjagiin.
Kulturlávdegoddi jugii veahkkeruđaid oktiibuot 220 000 euro ovddas.
Sámedikki doaimmahahkii bohte oktiibuot 82 ohcamuša, main doarjagat ohccojuvvojedje oktiibuot 449 749 euro ovddas.
Mieđihuvvon doarjagat leat oaivvilduvvon sámegielat kultuvrra ovddideapmái, davviriikkalaš sámeservviid doarjumii ja sámekirkostobuin fuolaheapmái.
Sámi Duodjái stuorámus doaibmandoarjja
Davviriikkaid sámeservviide sámedikki kulturlávdegoddi juolludii oktiibuot 18 000 euro. Eanemus veahkkeruđa oaččui Sámiráđi Suoma juogus, 5 500 euro.
Doaibmandoarjagiid ožžo 23 searvvi. Dain stuorámus ovttaskas doaibmandoarjagat mieđihuvvojedje Sámi Duodji -searvái ja Ohcejoga girkostohposearvái. Sámi Duodji oažžu 23 000 euro doaibmadoarjaga ja girkostobuid fuolaheapmái fas 14 000 euro.
Sámi bálgosat -searvi oaččui doaibmadoarjaga 2 000 euro. Ođđa searvi, Etelä-Suomen saamelaisyhdistys oaččui 1 200 euro doaibmandoarjaga.
Doarjagat maiddái ovttaskas olbmuid bargguide
Sámedikki kulturlávdegoddi juolludii maiddái doarjagiid ovttaskas olbmuide iešguđetlágan dáiddalaš ja kultuvrralaš bargguide. Dáiddáriidda ja duojáriidda juolludedje viehka seamma sturrosaš supmiid.
Ovdamearkka dihte musihkkáriin Mihkku Laitii mieđihedje 3000 euro prošeaktadoarjaga álbuma miksemii ja mastereremii.
Govvadáidaga suorggis 3000 euro sturrosaš bargostipeandda oaččui Seija Ranttila dáiddalaš bargamii.
Girjjálašvuođas Elle Maarit Arttijeff oaččui 3000 euro bargostipeandda mánáid govvagirjji várás.
Duodjesuorggis kulturdoarjaga ožžo golmmas. Ovdamearkka dihte Rauna Guttormii juolludedje 3000 euro rievssatbivdoárbbi sirdimii ja gođđosiid plánemii ja gođđimii.
Filbma- ja multimedia -suorggis prošeaktadoarjaga oaččui earret eará Milla Pulska. Son áigu 3000 euro doarjagiin dahkat lassegovvemiid musihkalaš oanehisfilmma ollašuhttimii.
Ovttaskas kulturdáhpáhusain eanemus doarjaga juolludedje Johtti Sápmelaččaide Márjjábeivviid lágideapmái, oktiibuot 5500 euro.
Almmustahttindoarjagiin ovdamearkka dihte Anarâškielâ servi oažžu oktiibuot 12 000 euro Anarâš-aviissa almmustahttimii.
Geahča buot kulturdoarjagiid oažžuid namaid ja ruhtasupmiid Sámedikki neahttasiiddus.
Divvojuvon 23.3.2026 diibmu 10:23. Álggos muitaleimmet sámedikki dieđáhusa vuođul, ahte Milla Pulska oaččui prošeaktadoarjaga vurket sámebálgosiid bigálusáiddiid droonain. Rivttes diehtu lea, ahte Pulska oaččui doarjaga musihkalaš oanehisfilmma lassegovvemiid ollašuhttimii.
