Il-Komunità tal-Premju Sakharov

Il-Komunità tal-Premju Sakharov ġiet żviluppata bħala estensjoni tal-Premju Sakharov, li l-Parlament Ewropew jagħtih għal xogħol eċċezzjonali favur id-drittijiet tal-bniedem.

Il-Komunità tal-Premju Sakharov tħaddan rebbieħa tal-Premju Sakharov u Membri tal-Parlament Ewropew (MPE). Ġiet varat mill-Parlament Ewropew fl-2008, meta l-Premju Sakharov iċċelebra l-20 anniversarju tiegħu. Il-ħolqien tal-Komunità rrikonoxxa r-rwol speċjali tar-rebbieħa tal-Premju Sakharov bħala Ambaxxaturi għal-Libertà tal-Ħsieb, u l-membri tagħha qablu li jsaħħu l-isforzi konġunti ta' appoġġ lid-difensuri tad-drittijiet tal-bniedem fid-dinja kollha permezz ta' azzjonijiet komuni meħuda mir-rebbieħa tal-Premju Sakharov u taħt l-awspiċi tal-Parlament Ewropew.

Il-Komunità tal-Premju Sakharov b'mod ġenerali tgħaqqad lill-MPE, ir-rebbieħa tal-Premju u s-soċjetà ċivili biex tqawwi l-kooperazzjoni rigward il-ħidma favur id-drittijiet tal-bniedem fi Brussell u internazzjonalment. Isservi bħala mezz ta' komunikazzjoni ħalli r-rebbieħa tal-premju u l-Parlament ikunu jistgħu jirrilevaw u jindirizzaw każijiet ta' ksur tad-drittijiet tal-bniedem u kwistjonijiet relatati. Il-membri tal-Komunità regolarment jagħtu lectures tas-Sakharov madwar l-UE biex iqajmu kuxjenza dwar kwistjonijiet tad-drittijiet tal-bniedem u jqanqlu dibattitu pubbliku fil-kapitali Ewropej.

Il-Komunità tlaqqgħet flimkien għal konferenzi fl-2008, l-2011, l-2013, l-2016 u l-2018. Il-konferenzi tal-Komunità tal-Premju Sakharov huma forum ta' dibattitu fost il-MPE, ir-rebbieħa tal-Premju, rappreżentanti tal-Unjoni Ewropea u istituzzjonijiet internazzjonali oħra u s-soċjetà ċivili, u jservu ta' bażi għal azzjoni msaħħa tan-netwerk favur id-drittijiet tal-bniedem.

Fl-4 u l-5 ta' Ġunju 2018, il-Komunità tal-Premju Sakharov ltaqgħet fi Brussell biex tiċċelebra t-30 anniversarju tal-Premju Sakharov, tiżen il-kisbiet tal-imgħoddi u tidentifika l-isfidi tal-ġejjieni. Il-konferenza saret fil-preżenza ta' membri tas-Sakharov Fellowship. Dawn il-Fellows huma parteċipanti fi programm li l-Komunità bdietu fl-2013 biex tagħti s-setgħa lil difensuri tad-drittijiet tal-bniedem minn madwar id-dinja.