GCRG er ei forskargruppe ved Institutt for historiske og klassiske studium. Gruppa samlar kollegaer med eit felles fokus på korleis globale prosessar som kolonisering og avkolonisering kjem til uttrykk lokalt. I dag er hovudfokuset den transatlantiske slavehandelen, kolonirike og koloniseringa av urfolk.

Gruppa arbeider for å utvikle ny kunnskap og forståing av historie og materialitet knytt til det dansk-norske koloniveldet, både i Noreg og internasjonalt. Forskinga er tverrfagleg og kombinerer perspektiv frå arkeologi, kulturminneforvaltning og historie. Denne faglege breidda gjer det mogleg å undersøkje empiri og analysere relasjonar frå ulike vinklar – både i tid og rom – og med utgangspunkt i postkoloniale og avkoloniseringsperspektiv.

Eit døme på slike perspektiv er korleis forholdet mellom norske og samiske grupper i Skandinavia vert forstått i lys av koloniale strukturar, frå jernalderen og mellomalderen til tidleg nytid. Gruppa ser òg på dei mange samfunnsgruppene som var i kontakt med den transatlantiske slavehandelen i den tidlegmoderne og moderne perioden.