Democratize er ei tverrfagleg forskingsgruppe som arbeider med demokratisering, og samlar forskarar frå historie, internasjonale relasjonar, europastudiar og statsvitskap. Dei deler ei forståing av demokratisering som ein dynamisk og sårbar prosess som aldri blir heilt fullført.

Gjennom utforsking av demokrati og demokratiseringsprosessar på tvers av tid og rom, studerer forskarane i gruppa:

• korleis demokratiar oppstår, både historisk og i samtida.
• korleis og kvifor demokratiar konsoliderer seg, og kva som gjer dei motstandsdyktige (til dømes politisk kultur og sivilsamfunn).
• omgrep om demokrati gjennom tid og rom.
• demokratiske praksisar (til dømes underskriftskampanjar og røysting).
• den internasjonale konteksten for demokratisering (til dømes kolonialisme, samtidsretta demokratifremjing og rolla til alternative normleverandørar).
• korleis demokratiar vert svekka som følgje av utanlandsk påverknad, framvekst av radikale parti, populisme og nasjonalisme.