– Vi ser at kyrkja begynner å bli nokså sliten. Vi er nøydde til å gjere store oppdateringar dei neste åra. Om ikkje risikerer vi å måtte stenge kyrkja.
Det seier Ole Martin Olsen, kyrkjeverje i Hammerfest kyrkje.
Kyrkja i Hammerfest stod ferdig i 1961, og har sidan den gongen hatt oppussingar på 1980-talet og på 2000-talet. På grunn av manglande pengar til vedlikehald gjennom fleire år, er kyrkja no i svært dårleg forfatning.
Men denne gjenreisingskyrkja er langt frå den einaste som har dette problemet.
SIDAN 1961: Gjenreisingskyrkja i Hammerfest har stått der sidan 1961.
Foto: Matheo Dolva / NRKDårleg stand på halvparten av kyrkjer
I ein ny rapport frå Hovedorganisasjonen KA er det ein nedgang i tilstanden for rundt 750 av dei 1500 kyrkjene som tilhøyrer Den norske kyrkja.
– Det er mange kyrkjer i Noreg som har behov for oppgradering, vi er ikkje aleine om det, seier Olsen.
Kyrkja i Hammerfest har skadar både på utsida og innsida av bygget, mellom anna på lagerrommet, i tårnet og i salen.
Store bitar murpuss har falle av ytterveggen, det er mange store sprekkar i veggane og vasskadane i taket er omfattande.
– Det er vanskeleg å skaffe finansiering. Og Hammerfest kommune, som er ansvarlege i samsvar med lova, har hatt utfordringar med økonomien i mange år.
Sjå skadane på gjenreisingskyrkja her:
– Framleis forsvarleg å drifte kyrkja
Rapporten seier ikkje noko sikkert om kva som er grunnane til tilstandsnedgangen blant norske kyrkjer, men listar opp tre element som kan vere medverkande:
Alderen på byggematerialet, våtare klima og strammare kommuneøkonomi.
Ordførar i Hammerfest kommune, Terje Rogde, erkjenner at noko må gjerast. Men han understrekar at dette ikkje nødvendigvis må skje med éin gong.
– Sånn som vi ser det no, så er det framleis forsvarleg å drifte kyrkja. Men vi ønsker å komme i betre dialog med kyrkja, og finne ein plan på det vidare arbeidet.
OPPTATT AV KYRKJA: Ordføraren i Hammerfest seier at kommunen skal passe på at kyrkja skal bli pussa opp.
Foto: Allan KloMeiner det hastar
Staten har no oppretta Kyrkjebevaringsfondet, som tiltak for å komme etterslepet i møte når det gjeld renoveringane av dei norske kyrkjene. Her kan det søkast om pengestøtte til oppussing av kyrkjebygg.
Kyrkjeverje Olsen meiner at det hastar å få starta søknadsprosessen for å redde Hammerfest kyrkje.
– Eg håpar at Kyrkjebevaringsfondet bidrar til at fleire kommunar kan vere med på å investere i kyrkjer som ikkje ser bra ut.
– Og at også Hammerfest kommune etter kvart løyver pengane slik at vi kan oppgradere kyrkja, seier Olsen.
