Handelshøgskolen UiS er på jakt etter dyktige og motiverte studentar som ynskjer å kombinere studiet med jobb hausten 2026. Søknadsfristen er 26. mai.
Som studentassistent kan du bidra til medstudentar sine læringsopplevingar på mange og viktige måtar, særleg ved å formidle fagstoffet frå eit studentperspektiv. Som student kan du kommunisere fagstoff med ei annan vinkling enn ein erfaren førelesar kan. Dei generelle tilbakemeldingane frå studentar er at bidraget frå studentassistentane er viktig for læringa.
Oppgåver for ein studentassistent kan inkludere å ha trefftid med studentane, arrangere seminar og gruppearbeid, tilretteleggje for lab-øvingar, gje tilbakemeldingar på innleveringar og registrere oppmøte på obligatoriske aktivitetar. Alt arbeidet er i samarbeid med, og under rettleiing av fagansvarleg. Ettersom innhaldet i stillinga som studentassistent kan variere noko frå emne til emne, avtalast arbeidsoppgåver og tidsbruk direkte med fagleiar.
Ledige stillinger:
Bachelor i økonomi og administrasjon
- BØK108 Matematisk metode for økonomer
- BØK195 Grunnleggende regnskap og bedriftsøkonomi
- BØK255 Makroøkonomi
- BØK260 Corporate Finance
- BØK385 Entrepreneurship and Sustainable Startup
- BØK400 Contemporary human resource management (HRM)
- BØK420 Skatterett I
- BØK455 Internasjonal økonomi
Bachelor i rettsvitskap
- BRV370 Skatterett I
- BRV390 Dyrevernrett
- BRV305 Velferdsrett
Master i økonomi og administrasjon
- MSB102 Business Decisions
- MSB103 Data Analytics
- MSB107 Business Economics
- MSB255 Supply Chain and Operations Management
Bachelor i digital serviceledelse
- BDS110 Digital kommunikasjon i serviceorganisasjoner
- BDS230 Innsikt og analyse i tjenesteinnovasjon
Bachelor i hotelledelse
- BRH210 Markedsføring
Master i serviceledelse i internasjonal business
- MHR101 Research Methods
- MHR102 Strategic Leadership and Management
Master i økonomisk omstilling og innovasjon (nytt)
- MEI202 Sustainable Entrepreneurship
Årsstudium i reiselivsledelse
- REI110 Markedsføring
Årsstudium i økonomi og jus – nettbasert (nytt)
- ÅØJ110 Virksomhetsetikk og samfunnsansvar (nettbasert)
- ÅØJ120 Organisasjon, ledelse og HMS (nettbasert)
- ÅØJ130 Innovasjon og entreprenørskap (nettbasert)
Vi søker også studentassistentar til ØkadLounge!
ØkadLounge er ein fagleg og sosial møtestad for studentar på bachelorstudiet (både første og andre året) i økonomi og administrasjon og årsstudiet i økonomi og leiing. I ØkadLounge kan studentar sitje og jobbe med studiet, få hjelp frå andre studentar og treffe vennar og kjende. Studentane får vaflar og noko varmt å drikke. Det vil alltid vere studentassistentar til stades for å hjelpe til med faglege spørsmål.
Din jobb som studentassistent er å få studentane til å føle seg velkomne, skape god stemning og hjelpe til med dei spørsmåla studentane måtte ha, etter beste evne.
Studentar med erfaring frå studentassistentstillingar blir føretrekte framfor andre når vi skal rekruttere. Dette er fordi dei har relevant erfaring og har vist engasjement i studietida.
Arbeidstid
Kor mykje ein studentassistent jobbar gjennom resten av semesteret, avheng av opplegget faglæraren lager i samarbeid med studentassistenten. Det kan variere frå nokre timar i eit par veker, til 10 timar kvar veke. Arbeidstimar inkluderer alltid både kontakttid med studentar og tid til førebuingar (t.d. førebuing til seminar og gjennomgang av oppgåver). Arbeidstid avtalast mellom studentassistenten og faglæraren, og godkjennast av dekan/programansvarleg. Som heiltidsstudent bør arbeidet ikkje overstige 10 timar per veke.
Lønn
Studentassistentar blir betalte på timebasis i samsvar med gjeldande statleg lønsregulativ.
- Bachelorstudentar: 206 kr pr time
- Masterstudentar: 210 kr pr time
Kriterium
Du må ha minst karakter B i emnet som du skal vere studentassistent i. Hvis du ikkje har tatt emnet tidlegare, vil faglærar gjere ei skjønnsmessig vurdering av dine kvalifikasjonar. Har du utdanning frå ein annan utdanningsinstitusjon, må du sende vitnemål med dokumentasjon på karakterar i dei emna du søkjer om å vere studentassistent i. Sendast på e-post til Cecilie E. Lund (cecilie.e.lund@uis.no). Marker i vitnemålet kva emne dette gjeld. Studentar som ikkje sender slik nødvendig dokumentasjon, blir ikkje vurderte. For å vere studentassistent på masterkurs må du vere masterstudent på 2. året.
Attest
Alle studentassistentar får sluttattest.
Kvifor bli studentassistent?
Her er fem gode grunnar!
Arbeidsgjevarar ser ikkje berre på utdanning når dei rekrutterer. Korleis skil du deg ut frå andre nyutdanna med same utdanning? Ein jobb som studentassistent gjev deg relevant arbeidserfaring allereie før du er ferdig utdanna. Gjennom å kombinere jobb og studiar viser du òg at du er strukturert og at du har god arbeidskapasitet.
Det er ei deltidsstilling som kan kombinerast med å vere heiltidsstudent. Å ha vore studentassistent signaliserer at du har viktig kompetanse: Du er dyktig, engasjert og motivert. At du har vore studentassistent viser at du gjerne tar ei utfordring, og ikkje er redd for å kaste deg ut i noko nytt.
Det finst knapt noko betre måte å lære på enn å lære bort. Ved å forklare fagstoff til medstudentar utviklar du sjølv ei djupare forståing av faget. Det stimulerer òg kreativiteten og kommunikasjonsevnene dine, sidan du må forhalde deg til studentar med ulik bakgrunn og kompetanse.
Dei aller fleste er ukomfortable med å presentere foran eit publikum. Men dette handlar om trening! Jo oftare du vågar å gå utanfor komfortsona di, desto større blir den. Du vil òg oppleve gleda av å sjå korleis medstudentar, på grunn av di hjelp, skjønar ein vanskeleg teori som du sjølv nyleg strevde med – og skjønte til slutt.
Som studentassistent får du moglegheita til å bygge viktige sosiale og faglege nettverk, sidan du samarbeider tett med førelesarane ved Handelshøgskolen. Gode samarbeidsevner blir høgt verdsett i arbeidslivet.
