Ċentri tal-cloud ekoloġiku u tad-data ekoloġika

It-teknoloġiji diġitali jistgħu joffru soluzzjonijiet ekoloġiċi lil setturi differenti tal-ekonomija. Daqstant importanti huwa l-“ekoloġizzazzjoni” tas-settur diġitali nnifsu.

Ġie stmat li t-teknoloġiji diġitali jammontaw għal bejn 5 u 9 % tal-konsum globali tal-elettriku. Dan x’aktarx li jiżdied bid-diġitalizzazzjoni u t-teknoloġiji emerġenti bħall-intelliġenza artifiċjali, l-Internet tal-Oġġetti u l-blockchain. Dan jista’ jwassal għal żieda problematika fl-emissjonijiet ta’ gassijiet serra jekk ma tittieħed l-ebda azzjoni xierqa.

Il-Kummissjoni Ewropea wettqet studju dwar Teknoloġiji u Politiki tal-Cloud Computing Effiċjenti fl-Enerġija għal Suq tal-Cloud Ekoloġiku li jindirizza l-kwistjoni tal-konsum dejjem jikber tal-enerġija minħabba l-espansjoni tas-servizzi tal-cloud fl-Ewropa.

Is-suġġett tal-cloud computing effiċjenti fl-użu tal-enerġija sar prijorità għall-UE. Iċ-ċentri tad-data jeħtieġ li jsiru aktar effiċjenti fl-użu tal-enerġija, jużaw mill-ġdid l-enerġija mormija bħas-sħana, u jużaw aktar sorsi ta’ enerġija rinnovabbli, bil-ħsieb li jsiru newtrali f’termini ta’ emissjonijiet tal-karbonju sal-2030.

Biex tilħaq dan l-għan, il-Kummissjoni se sserraħ fuq taħlita ta’ strumenti eżistenti, rieżamijiet tal-leġiżlazzjoni eżistenti u inizjattivi ġodda.

L-istrumenti eżistenti jinkludu:

• ir-Regolament dwar l-Ekodisinn għas-servers u għall-prodotti għall-ħżin tad-data
• il-Kodiċi ta’ Kondotta tal-UE dwar l-Effiċjenza Enerġetika taċ-Ċentri tad-Data
• il-kriterji tal-Akkwist Pubbliku Ekoloġiku tal-UE għaċ-ċentri tad-data, il-kmamar tas-servers u s-servizzi tal-cloud

Il-Kummissjoni qed torbot ukoll ċentri tad-data effiċjenti fl-enerġija ma’ inizjattivi ta’ politika u ta’ finanzjament, b’mod partikolari permezz ta’:

• il-Proposta tal-Kummissjoni għal Direttiva dwar l-effiċjenza enerġetika (riformulazzjoni) li tintroduċi elementi ġodda biex jittejbu l-effiċjenza enerġetika u l-monitoraġġ tas-sostenibbiltà taċ-ċentri tad-data;
• Ir-Regolament dwar it-Tassonomija u l-Att Delegat tiegħu adottat f’Lulju 2021, li jistabbilixxi l-qafas biex l-investimenti jiġu kkwalifikati bħala sostenibbli u li l-att delegat tiegħu bħalissa qed jiġi ffinalizzat, għandu taqsima dwar iċ-ċentri tad-data;
• Il-programmi ta’ finanzjament tiegħu: Orizzont Ewropa , il-Faċilità Nikkollegaw l-Ewropa 2, il-programm Ewropa Diġitali, InvestEU u l-Faċilità għall-Irkupru u r-Reżiljenza se jappoġġaw l-użu ta’ cloud innovattiva, ekoloġika u sigura.

Il-Kummissjoni wettqet studju biex tindirizza n-nuqqas ta’ definizzjonijiet u metodi aċċettati b’mod komuni biex tivvaluta l-effiċjenza enerġetika, in-newtralità klimatika u s-sostenibbiltà ġenerali taċ-ċentri tad-data. Dan l-istudju jipproponi miżuri ta’ politika li jtejbu l-effiċjenza enerġetika u l-prattiki tal-ekonomija ċirkolari fil-ktajjen tal-valur tal-ICT. Is-sejbiet ta’ dan l-istudju se jikkontribwixxu għal għadd ta’ inizjattivi kontinwi u futuri marbuta mat-tranżizzjonijiet ekoloġiċi u diġitali.