Lerk er ei slekt i furufamilien med 10—14 artar i Europa, Asia og Nord-Amerika. Dei fleste bartrekjennarar meiner no at det er 10 artar. Lerk skil seg frå dei fleste andre bartrea ved at nålene fell av om hausten.
Lerketrea er store tre med vassrett utståande eller hengande greiner. På langskota sit nålene spreidd, på kortskota sit dei i buntar.
Pollenkonglene («hannblomane») sit på kortskot utan nåler, frøkonglene («hoblomane») sit på kortskot med nåler. Nokre av dei beste skiljemerka mellom artane har frøkonglene, spesielt i kongleskjela.
Europalerk (Larix decidua) dannar skogar i Alpane og Karpatane og går opp til 2500 meter over havet. Sibirlerk (Larix sibirica) dannar store skogar frå europeisk Russland til Sibirs skoggrense mot nord og aust.
I nordaustlege Asia finst mongollerk (Larix gmelinii). Czekanow-lerk (Larix × czekanowskii) har ei liknande utbreiing. Larix mastersiana er ein sjeldsynt art som høyrer heime i Kina. I Kina og sørvestover til Nepal finst kinesisk lerk (Larix potaninii). Sikkimlerk (Larix griffithii) høyrer heime i Himalaya. Japanlerk (Larix kaempferi) dannar skogar i Japan.
Amerikalerk (Larix laricina) går til den polare skoggrensa i Nord-Amerika. Arten blir også kalla canadalerk og tamarack. I Nord-Amerika veks også kjempelerk (Larix occidentalis) og fjell-lerk (Larix lyallii).
I tillegg til dei naturleg førekommande artane har også den kunstige hybriden hybridlerk (Larix × marschlinsii) vore ein del bruka i europeisk skogbruk. Hybridlerken er europalerk kryssa med japanlerk.
| Nivå | Vitskapleg namn | Norsk namn |
|---|---|---|
| Rike | Plantae | planteriket |
| Rekke | Pinophyta | nakenfrøingar, nakenfrøete planter |
| Klasse | Pinopsida | bartrær |
| Orden | Pinales | furuordenen |
| Familie | Pinaceae | furufamilien |
| Slekt | Larix | lerkeslekta |
Systematikken følgjer Artsdatabankens inndeling (2024).
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.