bjørnebær

Dette er buskar med kvasse tornar. Blada er kopla og blomane kvite eller rødlege.

Frukta er ei samansett steinfrukt som liknar bringebær, men er svart eller svartraud, og skil seg elles frå bringebær ved at fruktene sit fast på fruktbotnen.

Det finst ei stor mengd artar eller småartar, utbreidd i Europa, Vest-Asia, Nord-Afrika og Amerika. I Noreg finst mellom 20 og 25 artar, dei fleste utbreidde på Sørlandet, særleg i Aust-Agder. Den vanlegaste er skogbjørnebær (latinsk namn: Rubus nessensis), som på Austlandet går nord til Krødsherad og i kyststrøk nord til Nordmøre.

Fruktene av bjørnebær er svært gode til syltetøy. Nokon artar, med større frukter enn hos artane våre, er vanleg dyrka i Nord-Amerika. Ei kryssing mellom bringebær og ein amerikansk bjørnebærart har blitt kalla loganbær, som har store, svartrøde frukter og ber rikt.

Blada har i folkemedisinen vore brukte som middel mot diaré, og uttrekk har òg vore brukte som gurglevatn og til behandling av sår som ikkje ville gro.

Dyrka bjørnebær inneheld cirka 15 milligram vitamin C, 196 milligram kalium, 85 prosent vatn og 144 kilojoule tilførte energi per 100 gram etande vare.

• rosefamilien