History Today er eit engelskspråkleg populærhistorisk tidsskrift gjeve ut i London med eitt nummer kvar månad sidan januar 1951. Tidsskriftet siktar mot å publisera artiklar, intervju og bokmeldingar om alle historiske periodar og geografiske regionar. Innhaldet ligg innanfor eit breitt mangfald av historiefelt.
History Today siktar mot å popularisera historievitskapleg forsking, og tidsskriftet marknadsfører seg som det leiande populærhistoriske tidsskriftet i verda.
Grunnleggjaren av History Today var forretningsmannen Brendan Bracken, som hadde vore minister i regjeringa Churchill og styreleiar for næringslivsavisa Financial Times. Ifylgje tidsskriftet sjølv stamma namnet History Today frå Winston Churchill. Han skal ha sagt «we have made history today» då tidsskriftet vart lansert.
Seinare vart History today «frigjort» frå Financial Times og gjort til ein del av det kjende forlaget Longman pulishers, før det vart sjølveigande og ubunde frå 1981.
Frå starten var History Today klårt dominert av historie ovanfrå, med tung vekt på monarkiet, det britiske imperiet og krigar, – og med relativt snevert perspektivtilfang. Dette endra seg mykje etter 1970-åra. I dei seinare tiåra kan ein finna både politisk historie, historiografi og vitskapshistorie, sosialhistorie, økonomisk historie, demografisk historie, medisinsk historie og også kjønnshistorie- og miljøhistorie.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.