Høgskulen i Volda

Høgskulen i Volda har ein todelt leiingsmodell som inneber at rektor er vald av dei tilsette og studentane. Rektor fungerer som øvste faglege leiar og som styreleiar. Høgskuledirektøren fungerer som administrativ leiar og har ansvaret for den samla drifta av institusjonen og forvaltning.

Høgskulestyret er det øvste organet til institusjonen og fastset strategiar, budsjett og overordna prioriteringar for institusjonen.

Høgskulen er organisert i fire faglege avdelingar med kvar sin administrasjon og dekan:

• Avdeling for mediefag
• Avdeling for humanistiske fag og lærarutdanning
• Avdeling for samfunnsfag og historie
• Avdeling for kulturfag

Høgskulen i Volda vart etablert i 1994, då Møre og Romsdal distriktshøgskule Volda og Volda lærarhøgskule vart slått saman gjennom høgskulereforma.

Lærarhøgskulen har røter tilbake til 1861. Då vart lærarskulen Voldens høiere Almueskole med annecteret Dannelsesanstalt for Skoleholdere etablert. Møre og Romsdal distriktshøgskule vart etablert i Volda i 1971.

Høgskulen i Volda har eit særpreg knytt til nynorsk språk, profesjonsutdanning og regional tilhøyrsle, og har bygd opp eit av Noregs fremste fagmiljø for medieutdanning.

Campusområdet speglar denne historiske utviklinga. Det eldste bygget, Henrik Kaarstad-huset, er frå 1922, då lærarskulen var den største i Skandinavia. Hans Strøm-huset (1984) og Ivar Aasen-huset (1971) vart reist i samband med utviklinga av distriktshøgskulen. I 1998 vart Berte Kanutte-huset, som i dag husar høgskulens administrasjon og bibliotek, teke i bruk. Det nyaste tilskotet er Sivert Aarflot-huset frå 2021 som er eit moderne mediebygg med studio, redaksjonslokale og framtidslaboratorium. Bygningane er oppkalla etter historiske personar med tilknyting til opplysning, språk og utdanning på Sunnmøre.

I 2024 hadde høgskulen 4445 registrerte studentar, 3566 på lågare grads nivå og 675 på høgare grads nivå. Høgskulen har 374 årsverk, og 247 er faglege stillingar. I 2023 hadde høgskulen 20 doktorgradskandidatar totalt. Driftsinntektene var 523 millionar kroner.

• Møre og Romsdal
• høgskule

• Høgskulen i Volda
• Nykeltal frå Database for statistikk om høgare utdanning (DBH)