Bård Hoksrud er ein norsk politikar frå Framstegspartiet som frå 2005 er stortingsrepresentant frå Telemark. Han var vararepresentant 1997–2005.
Hoksrud var frå august 2018 til januar 2019 landbruksminister i Regjeringa Solberg. Frå 2013 til 2015 var han statssekretær i Samferdselsdepartementet.
Hoksrud fullførte treårig vidaregåande opplæring i handel og kontorfag i 1992. Samstundes arbeidde han som butikkmedarbeidar. Frå 1994 til 1998 arbeidde han som assisterande butikksjef og butikksjef i daglegvarehandelen.
Hoksrud var medlem av kommunestyret i Bamble i 1991–2011 og frå 2015. Han var medlem av landsstyret i KS (Kommunenes sentralforbund) frå 2000 til 2005.
Frå 1998 vart han heiltidspolitikar, først som organisasjonssekretær i Framstegspartiet og frå 2001 som politisk rådgivar. Han var formann i Framstegspartiets Ungdom i 1999–2002 og distriktssekretær for Buskerud, Telemark og Vestfold i 2002–2005.
Hoksrud vart innvald på Stortinget frå Telemark i 2005. Mesteparten av tida har han vore medlem av transport- og kommunikasjonskomiteen, der han var nestleiar i 2020–2021 og er leiar frå 2025.
Hoksrud har markert seg imot det han kallar unødvendige forbod og reguleringar. Han har talt for å tillate lakrispiper, ståhjuling, vasskuter og sal av sjokolademjølk og anna søtt i skulekantiner. Han har òg vore rekna som ein folkeleg og frittalande politikar, anten han har uttalt seg om bompengar eller eldreomsorg.
I Framstegspartiet har han vore ein sentral politisk strateg i tida etter 2000. Han var tett på Carl I. Hagen som FpU-formann og rådgivar, og han heldt på denne posisjonen etter at Siv Jensen blei ny formann i 2006. Hoksrud er på mange måtar rekna som ein brubyggjar mellom dei tradisjonalistiske og dei liberalistiske fløyene i partiet.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.