Slettsnok er ein slange som ikkje er giftig. Han er éin av tre slangar som bur i Noreg. Slettsnokar finst langs kysten og eit stykke inn i landet mellom Østfold og Stavanger.
Slettsnok er ein vanleg slange i Europa, landa rundt Svartehavet og vest i Russland.
Slettsnokar blir rundt 75 centimeter lange og veg 60–190 gram. Dei har ein lang kropp utan bein. Kroppen er dekt av små skjel. Skjela er glatte, og det er difor han heiter slettsnok. Slett betyr glatt.
Kroppen er brun eller grå på oversida, med to rekkjer av mørke flekkar langs ryggen. Han har ein stor mørk flekk oppå hovudet. Mønsteret på nakken er spesielt for kvar enkelt slange. Forskarar kan bruke bilete av mønsteret til å skilje slettsnokar frå kvarandre. På magesida er kroppen lysare, frå mørk grå til oransje-gul. Hovudet er smalt. Om slettsnoken kjenner seg truga, kan han spile ut hovudet så det verkar større.
Som andre slangar har slettsnoken ei tunge med to spissar. Spissane samlar inn kjemiske signal som slangen nyttar til å finne byttedyr og oppdage farar.
Sjølv om slettsnokar ikkje er farlege eller giftige, er dei ville dyr som har det best om dei får vere i fred i naturen. Forskarar kan løfte slangane for å ta bilete og undersøkje dei.
Slettsnokar trivst i tørre, varme område der sola skin mykje av dagen. Dei likar å liggje i haugar av stein eller på berg med sprekkar. Dei bruker varmen frå steinane og sola til å varme opp kroppen. I Noreg et slettsnokar mest stålorm og spissmus. Dei kan også ete firfisler, andre slangar, smågnagarar, fuglar og fugleegg. Slettsnokar kan også ete andre slettsnokar.
Slettsnokar drep byttet sitt på same måte som kvelarslangar gjer det. Dei slyngjer seg rundt det og klemmer hardt til hjartet stoppar. Dei kan byrje å svelgje byttet før det er heilt dødt. Slettsnokar svelgjer byttet med hovudet fyrst.
Om vinteren går slettsnoken i dvale.
Slettsnokar parar seg oftast om våren. Hoa er drektig i to til tre månader. Ungane blir som oftast fødde i august eller september. Det kan vere 3–17 ungar i eit kull. Ungane veg rundt 3 gram, og er 20 centimeter lange. Ungane har oransje buk.
I Noreg føder hoa ungar annankvart år. Det året hoa får ungar brukar ho mykje tid på å varme seg i sola, og et nesten ikkje. Det året ho ikkje får ungar jaktar ho mykje, og et mykje for å leggje på seg. Det er for at ho skal ha energi til å få ungar neste år.
