Når ein strekkjer ut ein strikk, blir forma på strikken endra. Ein brukar kraft på strikken.
Tyngdekrafta dreg eplet ned mot Jorda. Det er også tyngdekrafta som får Månen til å gå i bane rundt Jorda.
Kraft er det som får ting til å bevege seg på ein ny måte eller forandre form. Viss ein til dømes sparkar ein fotball, brukar ein kraft frå foten til å bevege fotballen. Viss ein krøllar saman eit ark, brukar ein kraft frå handa til å endre forma på arket.
Ei kraft verkar alltid mellom to ting, til dømes ein fot og ein fotball. Ein fotball kan ikkje sparke seg sjølv. Det går heller ikkje an å løfte opp seg sjølv.
Døme på krefter:
Kraft kan også få ting til å stoppe. Ein kan til dømes bruke kraft til å dytte på eit rullebrett, slik at det byrjar å trille. Ein kan også bruke kraft til å stoppe rullebrettet når det har byrja å trille.
Ein kan dele inn krefter i to typar. Den eine typen blir kalla kontaktkrefter, og den andre typen blir kalla fjernkrefter.
Kontaktkrefter verkar berre mellom ting som er heilt borti kvarandre, det vil seie at dei har kontakt. Viss ein til dømes skal sparke ein fotball, må foten komme heilt borti ballen. Viss foten og ballen ikkje er borti kvarandre, vil det ikkje verke noka kraft mellom dei. Då vil ikkje ballen byrje å bevege seg.
Fjernkrefter kan verke mellom ting, sjølv om dei ikkje er borti kvarandre. Viss ein hoppar opp i lufta, er ein ikkje borti Jorda. Likevel blir ein dregen ned att til Jorda av tyngdekrafta. Eit anna døme på fjernkrefter er magnetiske krefter. To magnetar blir dregne mot kvarandre, sjølv om dei ikkje ligg heilt inntil kvarandre.
Korleis ein ting bevegar seg, eller endrar form, kjem an på om det verkar svak eller sterk kraft på han. Viss ein bruker lite kraft til å sparke ein fotball, vil han trille sakte. Viss ein bruker mykje kraft til å sparke ein fotball, vil han trille fort.
Viss ein veit kva for krefter som verkar på ein ting, kan ein rekne ut korleis tingen kjem til å bevege seg.
Viss ein slepper ein ball, vil tyngdekrafta trekkje ballen nedover. Samtidig vil friksjonskrafta frå lufta bremse ballen. Dette blir kalla luftmotstand. Viss ein både veit kor stor tyngdekrafta og luftmotstanden er, kan ein rekne ut farten til ballen.
Å rekne på krefter er ein viktig del av jobben til fysikarar.
