I kristendomen fortel engelen Gabriel Maria at ho skal få ein son, Jesus.
Skytsengel på eit tysk postkort frå cirka 1900. Skytsengel er i fleire religionar ein engel som vernar menneske, trusfellesskap eller nasjonar mot farar.
I boka og serien Gode varsler av Neil Gaiman og Terry Pratchett samarbeider ein engel og ein demon om å redde verda.
Ein engel er eit overnaturleg vesen. Dei blir ofte skildra som lysande, menneskelege vesen med venger.
I fleire religionar er englar Guds tenarar og sendebod. Dei kan òg vere vernarar.
Englar finst i både jødedom, kristendom og islam. Dei finst òg i folketru.
Ifølge heilage jødiske tekstar er englane Guds tenarar. Englane kan både hjelpe og straffe menneska. Dei har eigne namn og personlegdomar.
Ein av dei viktigaste englane er Mikael, som er Israels vernar. Han blir nemnd saman med Gabriel i Bibelen. Andre englar, som Rafael og Uriel, er med i seinare jødiske skrifter.
Kristendomen byggjer på mange av dei same forteljingane om englar som finst i jødedomen.
I Det nye testamentet blir englar skildra som sendebod frå Gud. Dei kan òg vere vernande skytsenglar og tenarar i himmelen. Ifølge evangelia snakka Jesus om englar fleire gonger.
Namnet til to av englane blir nemnde i Det nye testamentet:
I Det nye testamentet står det at englane har ei viktig rolle når Jesus kjem tilbake til jorda. Dei skal varsle at han kjem, og fortelje kva som skal skje med menneska. Ifølge nokre tekstar skal dei òg straffe dei som ikkje har følgt Guds vilje.
Englar blir ofte nemnde i Koranen. Ifølge Koranen er englane usynlege vesen laga av lys. Nokre englar held seg i nærleiken av Gud og tilber han. Englane er òg bodbringarar mellom Gud og menneske. Profeten Muhammed fekk openberringar frå Gud gjennom engelen Gabriel.
Englar har vore ein del av kunst og kultur i over to tusen år. Tidlegare kunne dei til dømes vere ei blanding av dyr og menneske. Etter kvart vart det vanleg å teikne eller måle dei som vakre, lysande menneske i kvite klede med venger. Englar kan vere både barn og vaksne. Av og til speler dei instrument, som harpe eller trompet.
Det er òg laga filmar, TV-seriar, teikneseriar og bøker der englar er med. Dei blir gjerne framstilte som symbol på det gode, på håp og trøyst.
Ordet engel blir òg brukt på litt andre måtar. Viss ein person er snill og hjelpsam, kan ein seie hen er «ein engel». Å «ha englevakt» er når ein har unngått fare.
Ordet engel kjem frå gresk og betyr ’sendebod’.
