diskvalifisering

I idrettar der utøvarane konkurrerer éin mot éin, kan dei bli diskvalifiserte frå resten av konkurransen og ikkje få resultat. Det gjeld dersom dei bryt reglane, som når dei bruker teknikkar som ikkje er lov. Det kan til eksempel skje i kampsport, trav eller alpint. I løping kan ein bli diskvalifisert dersom ein startar før dei andre. Det blir kalla tjuvstart.

Utøvarar kan bli diskvalifiserte for lengre periodar og få annullert resultata sine, om dei har brukt doping. Doping er medisinar eller narkotika som gir utøvaren ein urettferdig fordel i ein idrett. Det er ikkje lov med doping. I store konkurransar, for eksempel i OL, VM og NM, blir det teke prøver av utøvarane for å sjekke at dei ikkje har brukt doping.

Ein utøvar som er teken for doping, kan bli stengd ute frå konkurransar i fleire år.

I nokre lagsportar kan ein bli diskvalifisert i avgrensa tid, ikkje for heile kampen. Det blir kalla utvising og er vanleg til dømes i handball og ishockey. Ein spelar som blir utvist i fotball får ikkje komme inn att på bana den kampen.

• idrett
• konkurranse – idrett
• kvalifisering